كوميك كون دبي 2018

مر على كوميك كون كم شهر .. وكعادتي .. شاركت فيه هالسنة بعد..

 

تسألوني كيف كان التنظيم والاقبال هالسنة؟

 

ردي على هالسؤال ما راح يكون مثل ردات فعل البقية الي متضايقين من التنظيم .. فيه منهم الي خلاص قرر انه ما يشارك او حتى ما يحضر المعرض!

 

لو سألتوني شو رايج ..بقولكم انه اعتقد ردت فعلهم مبالغ فيها شوي..

انا معاكم انه التنظيم كان مستواه مش كمستوى السنوات السابقة و يمكن الجودة كل ما تقدمت السنوات صارت في تدني..

ولكن..

شو هي اولوياتكم في المشاركة او حضور هالمعرض؟

هل هو المردود المالي؟ “المادة” ؟

او هل هو انك توسع من معارفك او تواصلك ؟

او شي ثاني؟

ما اعتقد انه حالة النقد و الشكوى راح تفيد انه تغير من الواقع شي …

 

بالنسبه لي انا اشوفه فرصه ذهبية و من خلاله طلعت لي فرص رائعة منها اني اشتركت في جائزة وفزت فيها..وسافرت لليابان ودرست عند مانجاكا يابانية ..غير المقابلات التلفزيونيه و مقابلات الجرايد..  وفرص كثيره غيرها الي لازلت تجيني من الظهور في هذه المعارض..الحمدلله

 

يعني الواحد مش خسران لو عنده الامكانيه في دفع 1500+ درهم للطاولة ..بالمقابل راح يحط نفسه في مكان يقدر من خلاله انه يحصل فرص ..لو اقولكم عدد الناس الي تمر وتكون عندهم فرص جميله ..و يعطونكم كومشنز و غيرها ..

هذا غير انه الناس الي تقدر رسمك و فنك متعودين انهم يزورونك في هالمعارض..لانهم يعرفون انك موجود هناك دايما!

ماتعرفون كمية السعادة الي تملي قلبي في كل كوميك كون دبي ..لانه كثير ناس يزوروني و هم يعرفون اني مشاركة وجايين خصيصا لمقابلتي! لاتحرمون نفسكم من التواصل مع هؤلاء الرائعيين!!

هذا غير أصدقائنا الرسامين الي نشوفهم بس في هالمعارض ..

حماس ..

و سوالف و مواقف تضحك!

ولحضات حلوه.. الواحد ما يفوتها!

هذا بالنسبة لي ثمنه اكبر بكثير من “مردود مالي” بعد البيع.

 

 

error: