العائق الفني

ممكن تستغربون من اسم العنوان ..

كأنه اسم يديد وغريب..

المصطلج هذا ترجمه حرفية لكلمة Artist Block .. شو هو الارتست بلوك او العائق الفني..

هي لما الواحد ما يقدر يرسم ويحس انه ماعنده افكار او ماله مزاج يرسم او يبدع… ولو رسم يواجه صعوبة كبيرة في هذا الشي، وممكن رسماته ما تعجبه او ما يحب النتيجة فيحس بالاحباط اكثر و اكثر..

 

متاكده انه كثير رسامين يواجهون هالشي..

ممكن تفكرون اني عندي حل سحري للموضوع بما انه صار لي وقت طويل ارسم..بس للاسف ماعندي حل جذري للموضوع..

 

لكن حابه اني اشارككم بعض الافكار والامور الي اسويها وممكن تساعد في تخفيف حدة هذا العائق الفني..

خلوني اقولكم شو هي الخطوات الي اسويها لو حسيت اني في حالة “ارتست بلوك”

1- اول شي و اهم شي ، لا تحسون بالاحباط والحزن .. دايما احاول اذكر نفسي انها فترة و تعدي..وما راح تستمر للابد..

بغض النظر عن الاحباط الي احس به فهي حالة مؤقته وبتروح عاجلا ام اجلا..فما في فايده اني احس بالضيق..حتى لو اشتقت للرسم ..

2- اجرب انوع من الفنون المختلفة والي ما جربتها قبل. هالشي يساعدني اجدد معلوماتي و معنوياتي و يخليني اغير وجهة تركيزي لشي اخر غير طريقة الرسم المتعودة عليها. ممكن يكون مثلا الرسم الزيتي او المائي او حتى حرفة يدوية يديده. المهم شي تستمتع فيه.

3- حاول دايما تغذي بصرك برسومات تحبها سواء عن طريق اقتناء كتب رسم او عن طريق الانترنت و مواقع التواصل الاجتماعي، ولكن!! اعرف معظمكم قرأ هالجملة ومر على باله انه هالنصيحة ممكن ما تساعد البعض، لانهم بالعكس راح ينحبطون اكثر لانهم قاعدين يشوفون رسومات جميلة و يقارنون نفسهم للرسامين الاخرين ..صدقوني مافي فايده من المقارنه. لانه في النهاية هذي ليست مسابقة!! من هو احسن؟ ومن هو اروع ؟و من هو الافضل؟

اكيد في بداية مشوارنا كلنا مرينا بهذي الافكار.. لكني توصلت لقناعة انه كل شخص يعبر عن نفسه بالرسم ..وكلنا مميزين بطريقتن الخاصة ..

الفن والرسم شي شخصي جدا.. مايصير الواحد يقارن نفسه مع شخص ثاني ..كلن وله مميزاته و عيوبه..

لكن من باب التحسين مش غلط انك تتعلم تقنيات جديدة في الرسم و تسمع النقد البناء على رسوماتك..

 

موضوع النقد طوييييل جدا…خلونا ما ندخل فيه اليوم!

 

4- بالنسبة لي المكان الي اشتغل فيه او ارسم فيه جدا مهم .. بمعنى لو كانت غرفتك هي وين ترسم فضروري انك ترتب الغرفة وتدخل نفسك في مزاج الرسم … رتب اغرضك وحطهم في مكانهم الخاص..نظف الارض..رتب السرير .. شغل موسيقى تحبها .. لو عندك شموع معطره اشعلها!

..اكيد فهمت فكرتي الحين ..

وطبعا لا تنسى مشروبك المفضل… انا عن نفسي احب اجهز لنفسي قهوة بالحليب.. D:

 

على فكره! مرة جربت شي وفعلا جاب نتيجة .. لو كنتوا تملكون طاولة خلوها فاضية تمام من اي شي على السطح..فقط اقلام الرسم و الاوراق او الدفتر الي بتستخدمونه ..بالنسبة لي كان فيه فايده وخلاني اركز على الرسم ..

احيانا البيت ما يكون المكان المناسب.. لظروف معينه .. جربوا تاخذون عدتكم للمقهى المفضل عندكم..اهم شي عندهم مكان هادي .. و قهوتكم المفضله ..

5-  الموسيقى ..مهمه جدا ! و فعلا تغير المزاج و اتدخلك في مزاج الرسم ..لو كانت الرسمه حزينه بتسمع لحن حزين و تدخل الجو..لو كانت الرسمه حماسيه و قتاليه ..تسمع اغاني او الحان فيها طاقة وهكذا!

6- في فترة كنت امارس رياضة المشي بشكل يومي و كنت اروح لحديقة جميلة قريبة من بيتنا.. كنت البس سماعات الايفون و اسمع موسيقتي المفضلة وامشي…لو تعرفون كمية الافكار الي كانت تجيني كل يوم في وقت المشي! وممكن اتخيل قصص كاملة وسيناريوهات لرسومات و كوميك .. حتى لو كان حماسي للرسم صفر يصير الف!

 

اتمنى انه هالافكار تكون ساعدتكم ولو قليلا.

اترك تعليقاً

لن يتم نشر عنوان بريدك الإلكتروني.

error: